អត្ថបទ និង រូបភាព RFI Khmer:
អតីតសកម្មជនដីធ្លីតំបន់បឹងកក់ ដែលបំបែកខ្លួនចេញពីអ្នកស្រីទេព វណ្ណី បានចំណាយពេលពេញមួយព្រឹកថ្ងៃសុក្រនេះ ដើរដាក់ញ្ញតិទៅកាន់ស្ថានទូតបទេសមួយចំនួននៅក្នុងទីក្រុងភ្នំពេញ និងធនាគាពិភពលោកផងដែរ ដើម្បីលាតត្រដាងពីសកម្មភាពតវ៉ានាពេលកន្លងមករបស់អ្នកស្រី ទេព វណ្ណី។ ក៏ប៉ុន្តែអ្នកស្រី ទេព វណ្ណីបានបដិសេធជាថ្មីទៀតនូវការចោទប្រកាន់ទាំងអស់នេះ។
សកម្មជនដីធ្លីបឹងកក់ដែលបានបែកចេញពីអ្នកស្រី ទេព វណ្ណី ដែលអះអាងថាមានចំនួន ១០០នាក់ នៅព្រឹកថ្ងៃសុក្រ ទី ០៥ កក្កដា បាននាំគ្នាយកញ្ញតិទៅកាន់ស្ថានទូតមួយចំនួនប្រចាំនៅកម្ពុជា ក្នុងនោះមានស្ថានទូតអាមេរិក បារាំង អង់គ្លេស សហភាពអឺរ៉ុប និង ធនាគារពិភពលោក។
អតីតអ្នកតវ៉ាដីធ្លីបឹងកក់បាននាំគ្នាស្រែកមេក្រូ នៅពីមុខស្ថានទូត និងស្ថាប័នអន្តរជាតិទាំងនោះ ដើម្បីស្នើកុំឲ្យមានការទទួលស្គាល់ និងផ្តល់ជំនួយ ព្រមទាំងលាតត្រដាងពីសកម្មភាព លោកស្រី ទេព វណ្ណី រឿងដីធ្លីកន្លងមកថាមានកំហុសឆ្គង។
នៅក្នុងញត្តិដែលបានដាក់ជូនស្ថានទូតនានា និងធនាគារពិភពលោក ឲ្យដឹងថាក្រុមអ្នក បឹងកក់ ប្រឆាំង ទេព វណ្ណី បានឲ្យដឹងថាពួកគេ បដិសេធ ឈប់ទទួលស្គាល់បុគ្គល ទេព វណ្ណនី ទៀតហើយ ដោយបញ្ជាក់ថា ទេព វណ្ណនី គឺជាមនុស្សដែលធ្វើសកម្មភាពកៀងគរប្រជាពលរដ្ឋ ដើម្បី បំរើឲ្យបក្សខ្លួន និងក្រុមខ្លួន ព្រមទាំងបានប្រព្រឹត្តអំពើពុករលួយ។ ជាមួយគ្នានោះ ទេព វណ្ណនី ធ្វើអាជីវកម្ម បង្កសកម្មភាពផ្សេងៗ ដើម្បីរកជំនួយពីអង្គការសង្គមស៊ីវិលនៅក្រៅប្រទេស បម្រើផលប្រយោជន៍ខ្លួន។
ក៏ប៉ុន្តែម្តងហើយម្តងទៀត លោកស្រីទេព វណ្ណី បានបដិសេធចោលនូវការចោទប្រកាន់ទាំងអស់នេះ។ អ្នកស្រីទេព វណ្ណនី ដែលត្រូវបានជ្រើសរើសជាជ័យលាភីពានរង្វាន់ Global Partnership កាលពីខែវិច្ឆិកាឆ្នាំ២០១២កន្លងទៅនេះ បានប្រាប់វិទ្យុបារាំង RFI ថាគេកំពុងព្យាយាមបំបែកសកម្មជនដីធ្លីបឹងកក់ដោយបង្កើតជាសកម្មភាពផ្សេងៗ ក្នុងផលប្រយោជន៍
នយោបាយនៅមុនពេលបោះឆ្នោត ក៏ប៉ុន្តែហេតុការណ៍នេះមិនបានធ្វើឲ្យឆន្ទៈតស៊ូដីធ្លីរបស់
លោកស្រី មានការថមថយនោះទេ ផ្ទុយទៅវិញកាន់តែធ្វើឲ្យសកម្មភាពការពារសិទ្ធដីធ្លីកាន់តែពុះកញ្ជ្រោលឡើង។
ជាមួយគ្នានេះលោកស្រីទេព វណ្ណីមិនមានប្រតិកម្មអ្វីតបតជាថ្មី ចំពោះអ្នកដែលដើរដាក់ញ្ញតិទៅកាន់អតីតសកម្មជនបំបែកខ្លួននោះទេ ក៏ប៉ុន្តែលោកស្រីមានជំនឿថា ស្ថានទូតអន្តរជាតិនិងធនាគារពិភពលោក នឹងមានការវិនិច្ឆ័យ ដោយសារតែពួកគេមានការពិចារណាយ៉ាងល្អិតល្អន់មុននឹងសម្រេចផ្តល់ពានរង្វាន់ Global Partnership ដល់លោកស្រី។
លើសពីនេះ អ្នកស្រីទេព វណ្ណី បានបង្ហើបថា គណកម្មការផ្តល់ពានរង្វាន់ដល់អ្នកស្រី បានប្រាប់តាមរយៈសារមួយមកអង្គការសិទ្ធិមនុស្សនានានៅក្នុងប្រទេសកម្ពុជា អោយតាមឃ្លាំមើលពីសុវត្ថិភាពរបស់អ្នកស្រី៕
ស្តាប់ការផ្សាយផ្ទាល់របស់វិទ្យុសំបុកឃ្មុំពីភ្នំពេញ
ផ្សាយផ្ទាល់នៅម៉ោង
៥ព្រឹកនិង៨:៣០យប់
