អត្ថបទ និង រូបភាព www.postkhmer.com:
កំពង់ឆ្នាំងៈ មេបញ្ជាការតំបន់ប្រតិបត្តិការសឹករង ខេត្ត កំពង់ឆ្នាំង ត្រូវបានដំឡើងឋានៈ ទៅជាអភិបាលខេត្ត កំពង់ឆ្នាំង ជំនួសតំណែង លោក ទូច ម៉ារីម ដែលបានទទួលមរណភាព ដោយសារជំងឺមហារីក កាលពីសប្ដាហ៍មុន។
យោងតាមព្រះរាជក្រឹត្យ របស់ព្រះមហាក្សត្រ នរោត្តម សីហមុនី ចុះថ្ងៃទី១៩ ខែកញ្ញា ឆ្នាំ ២០១៣ ថ្មីៗនេះ បានឲ្យដឹងថា លោក ឧត្ដមសេនីយ៍ត្រី ឈួរ ច័ន្ទឌឿន មេបញ្ជាការតំបន់ប្រតិបត្តិការសឹករង ខេត្ត កំពង់ឆ្នាំង ត្រូវតែងតាំងជាអភិបាលនៃគណៈអភិបាលខេត្តកំពង់ឆ្នាំង មានឋានន្តរស័ក្តិជាឧត្ដមមន្ត្រីថ្នាក់ទី៥ ក្នុងជួររាជរដ្ឋាភិបាលកម្ពុជា។
លោកវរសេនីយ៍ត្រី ហេង សំអុន ប្រធាននគរបាលស្ថិតិ ខេត្ត កំពង់ឆ្នាំងបានឲ្យដឹងថា លោកឧត្ដមសេនីយ៍ត្រី ឈួរ ច័ន្ទឌឿន គឺជាមេបញ្ជាការយោធាជើងចាស់មួយរូប គួរឲ្យគោរព និងមានបទពិសោធពហុវិស័យនៅក្នុងខេត្តនេះ។ លោកបានចូលធ្វើទាហានតាំងពីឆ្នាំ១៩៧៩មកម៉្លេះ។
លោកបានថ្លែងកាលពីថ្ងៃម្សិលមិញថា៖«ខ្ញុំសូមកោតសរសើរចំពោះការដំឡើងឋានន្តរ ស័ក្តិនេះ។ ខ្ញុំគិតថា ការដំឡើងឋានៈជាអភិបាលខេត្តនេះ គឺស័ក្តិសមនឹងសមត្ថភាពរបស់គាត់ខ្លាំងណាស់ ព្រោះគាត់គឺជាមេបញ្ជាការមួយរូបគួរឲ្យគោរព និងមានបទពិសោធច្រើន ហើយបានចូលបម្រើក្នុងជួរទាហានអស់រយៈពេលជាង៣០ឆ្នាំមកហើយ»។
លោកបាន ឲ្យដឹងទៀតថា ការតែងតាំងលោកឧត្ដមសេនីយ៍ត្រី ឈួរ ច័ន្ទឌឿន ជាអភិបាលខេត្ត កំពង់ឆ្នាំងនេះ ត្រូវបានធ្វើឡើង ក្រោមអធិបតីភាព លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងលោកឧបនាយករដ្ឋមន្ត្រី គង់ សំអុល រដ្ឋមន្ត្រីព្រះបរមរាជវាំង នៅក្នុងខេត្ត កំពង់ឆ្នាំងដែលបានធ្វើឡើងកាលពីថ្ងៃសុក្រ។ នៅក្នុងពិធីតែងតាំងនោះ លោកវរសេនីយ៍ឯក ធន់ ធឿន ជានាយសេនាធិការ និងជាមេបញ្ជាការតំបន់ប្រតិបត្តិការសឹករងខេត្ត កំពង់ឆ្នាំងក៏ ត្រូវបានតែងតាំងជាមេបញ្ជាការយោធានៅក្នុងខេត្តនេះផងដែរ។
លោក ទូច ម៉ារីម អាយុ ៥៧ ឆ្នាំ អភិបាលខេត្ត កំពង់ឆ្នាំង និងជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន បានទទួលមរណភាព ដោយជំងឺមហារីកកាលពីថ្ងៃទី១៨ខែកញ្ញាឆ្នាំ២០១៣ ៕
ស្តាប់ការផ្សាយផ្ទាល់របស់វិទ្យុសំបុកឃ្មុំពីភ្នំពេញ
ផ្សាយផ្ទាល់នៅម៉ោង
៥ព្រឹកនិង៨:៣០យប់
