អត្ថបទ និង រូបភាព www.khmer.rfi.fr: រដ្ឋាភិបាលកម្ពុជានៅក្នុងឱកាសនៃទិវាបុណ្យសិទ្ធិកុមារអន្តរជាតិ ១មិថុនា ខួបលើកទី៦៥ និងទិវាប្រឆាំងពលកម្មកុមារលើកទី១៣ ថ្ងៃទី១២មិថុនា បានលើកឡើងពីការប្រឹងប្រែងក្នុងការលុបបំបាត់ពលកម្មកុមារ ការរំលោភបំពានសិទ្ធិកុមារ និងបញ្ហាមួយចំនួនទៀត។ ជាមួយគ្នានេះ អង្គការសង្គមស៊ីវិលថ្លែងថា នៅមានចំណុចអវិជ្ជមានជាច្រើនទៀត ដែលកុមារទទួលរងនៅក្នុងសង្គម។
នៅក្នុងឱកាសនៃទិវាសិទ្ធិកុមារអន្តរជាតិ១មិថុនា ខួបលើកទី៦៥ និងទិវាពិភពលោក លើកទី ១៣ប្រឆាំងពលកម្មកុមារដែលបានកំណត់នៅថ្ងៃទី១២មិថុនា មន្ត្រីរដ្ឋាភិបាលនិងអង្គការ
សង្គមស៊ីវិល បានសម្តែងនូវការអបអរនិងប្រារព្ធទិវានេះទៅតាមពេលវេលា ទីកន្លែងរបស់គេ រៀងៗខ្លួន។
នៅក្នុងការប្រារព្ធពិធីអបអរមួយកាលពីព្រឹកមិញនៅឯមជ្ឈមណ្ឌលកំសាន្តកោះពេជ្រដែលមានការចូលរួមពីមន្ត្រីរាជការសិស្សានុសិស្សផងនោះ លោកស្រីឧបនាយករដ្ឋមន្ត្រី ម៉ែនសំអន រដ្ឋមន្ត្រីក្រសួងទំនាក់ទំនងរដ្ឋសភានិងព្រឹទ្ធសភានិងអធិការកិច្ច បានថ្លែងលើកសរសើរដល់ក្រុមប្រឹក្សាជាតិស្តីពីកុមារ និងអង្គការដៃគូពាក់ព័ន្ធឯទៀត ដែលបានប្រឹងប្រែងជួយដល់កុមារកម្ពុជាឲ្យមានស្ថានភាពកាន់តែប្រសើរឡើង។ លោកស្រី ម៉ែន សំអន ថ្លែងដូច្នេះសំដៅទៅដល់ការធ្វើឲ្យកុមារចៀសផុតពីការកេងប្រវ័ញ្ចកំលាំងពលកម្មនិងការរំលោភបំពានសិទ្ធិរបស់កុមារ ព្រមទាំងការដកហូតកុមារពីទម្រង់ពលកម្មធ្ងន់ធ្ងរ ទៅកាន់ សាលារៀនជាដើម។
លោកស្រី ស៊ីម ស៊ូយាង នាយិការប្រតិបត្តិអង្គការការពារយុត្តិធម៌កុមារ បានឯកភាពទៅនឹង
ការលើកឡើងរបស់មន្ត្រីជាន់ខ្ពស់រដ្ឋាភិបាល នេះបើនិយាយពីទិដ្ឋភាពទូទៅ។ ការពោល
ដូច្នេះក៏ដោយសារតែមានចំណុចប្រសើរខ្លះៗ ដូចជាកុមារដែលមានទំនាស់ខាងផ្លូវច្បាប់កាលពីមុន កុមារត្រូវទទួលរងគ្រោះផ្ទួនៗពីការវាយដុំចាប់ពីមហាជនរហូតដល់សមត្ថកិច្ចទំរាំ
ដល់បញ្ជូនដល់តុលាការ។ តែពេលនេះកុមារចាប់ផ្តើមមានមេធាវីការពារ នៅពេលដែលគេ
ប្រឈមមុខនឹងផ្លូវច្បាប់។
ដោយឡែកស្ថានភាពកុមារដែលរងនូវការរំលោភសេពសន្ថវៈជាពិសេសនៅក្នុងគ្រួសារនៅតែមានសភាពព្រួយបារម្ភនៅឡើយ ដោយសារតែមានការសម្រួលគ្នាជាច្រើនករណីទាក់ទង
ទៅនឹងបញ្ហានេះ។ លោកស្រី ស៊ូយាង កត់សម្គាល់បន្តថា ការជួញដូរកុមារនិង អនីតិជននៅតែមិនអាចដាក់ទោសទៅលើអ្នកប្រព្រឹត្តិដែលមានខ្នងបង្អែក លើសពីនេះក៏មានការគំរាមកំហែងលើបុគ្គលិកបំរើការងារនេះដែរ។
ទោះជាយ៉ាងនេះក្តី នៅក្នុងសារលិខិតរបស់ប្រមុខរដ្ឋាភិបាលកម្ពុជាកាលពីថ្ងៃទី២៨ ឧសភា លោកនាយករដ្ឋមន្ត្រីហ៊ុន សែន បានអំពាវនាវដល់ពលរដ្ឋខ្មែរទាំងអស់រួមគ្នាដើម្បីអនុវត្ត អនុសញ្ញាស្តីពីសិទ្ធិកុមារ ឲ្យកាន់តែល្អប្រសើរ ដើម្បីឧត្តមប្រយោជន៍របស់កុមារ៕
TAGS: កម្ពុជា - សង្គមស៊ីវិល - សិទ្ធិមនុស្ស
ស្តាប់ការផ្សាយផ្ទាល់របស់វិទ្យុសំបុកឃ្មុំពីភ្នំពេញ
ផ្សាយផ្ទាល់នៅម៉ោង
៥ព្រឹកនិង៨:៣០យប់
