អត្ថបទ និង រូបភាព RFI Khmer:
ក្រុមអ្នកភូមិបឹងកក់ ដែលមានទំនាស់ដីធ្លីទំនងជាអាចទទួលបានដំណោះស្រាយឆាប់ៗនេះ បន្ទាប់ពីមានវត្តមានកូនប្រុសលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត ចូលអន្តរាគមន៍។ តំណាងអ្នកភូមិបឹងកក់៣នាក់ បានជួបជាមួយអភិបាលរាជធានីភ្នំពេញ និងលោក ហ៊ុ ន ម៉ាណែត កាលពីថ្ងៃពុធម្សិលមិញ។ ជំនួបរវាងអាជ្ញាធររាជធានីជាមួយអ្នកភូមិបឹងកក់ត្រូវធ្វើឡើងជាថ្មីទៀតនៅរសៀលថ្ងៃនេះ។
ទីបំផុតទៅ លោក ហ៊ុន ម៉ាណែត កូនប្រុសច្បងលោកនាយករដ្ឋមន្ត្រី ហ៊ុន សែន បានចេញមុខអន្តរាគមន៍ដោះស្រាយបញ្ហាបឹងកក់។ លោកបានជួបជាមួយក្រុមអ្នកភូមិដោយផ្ទាល់កាលពីថ្ងៃពុធម្សិលមិញ។ ជំនួបដែលទទួលបានលទ្ធផលជាវិជ្ជមានគួរឲ្យកត់សម្គាល់។
លោក ចាន់ ពុទ្ធស័ក្តិ តំណាងអ្នកភូមិបឹងកក់បានប្រាប់វិទ្យុបារាំងអន្តរជាតិនៅព្រឹកថ្ងៃព្រហស្បតិ៍នេះថា លោកនិងតំណាងអ្នកភូមិពីរនាក់ទៀតបានជួបពិភាក្សាដោយផ្ទាល់ជាមួយអភិបាលរាជធានីភ្នំពេញ លោក ប៉ា សុជាតិវង្ស និងលោក ហ៊ុន ម៉ាណែត កាលពីថ្ងៃពុធនៅក្នុងសាលារាជធានីភ្នំពេញ។ ក្នុងជំនួបនោះ លោក ហ៊ុន ម៉ាណែត បានសន្យាថានឹងស្នើឲ្យក្រុមហ៊ុនបញ្ចូលឈ្មោះគ្រួសារអ្នកភូមិចំនួន ៤៨ គ្រួសារដែលមិនទាន់បានដីទៅក្នុងបញ្ជីដែលត្រូវទទួលបានដី។
តំណាងអ្នកភូមិបឹងកក់នឹងត្រូវជួបជាមួយតំណាងសាលារាជធានីភ្នំពេញម្តងទៀតនៅរសៀលថ្ងៃព្រហស្បតិ៍នេះ។ នេះបើយោងតាមប្រភពពីតំណាងអ្នកភូមិបឹងកក់ដដែល។ អ្នកស្រី ពេទ វន្នី សកម្មជនបឹងកក់បានសម្តែងក្តីសង្ឃឹមថា បញ្ហានឹងអាចដោះស្រាយបានប្រសិនបើមានកិច្ចអន្តរាគមន៍ដោយសុឆន្ទៈរបស់លោក ហ៊ុន ម៉ាណែត។
គួរម្លឹកថា តំបន់បឹងកក់ដែលមានទំហំផ្ទៃដីជាង ១០០ ហិកតា ត្រូវបានរាជរដ្ឋាភិបាលប្រគល់ឲ្យក្រុមហ៊ុនសម្បទានឈ្មោះ ស៊ូកាគូអ៊ីន អភិវឌ្ឍន៍ក្នុងរយៈពេល ៩០ឆ្នាំ។ គម្រោងនេះបានធ្វើឲ្យប៉ះពាល់ប្រជាជនជាង ៤០០០ គ្រួសារ។ ប៉ុន្តែ ប្រជាជនមួយភាគធំបានយល់ព្រមចាកចេញនិងទទួលយកគោលនយោបាយរបស់រដ្ឋាភិបាល។ ចុងក្រោយនេះ នៅសល់អ្នកភូមិ៤៨គ្រួសារដែលបន្តការតវ៉ារហូតមកទល់សព្វថ្ងៃ។
កិច្ចអន្តរាគមន៍ដោះស្រាយបញ្ហាបឹងកក់បានធ្វើឡើងខណៈដែលការបោះឆ្នោតកាន់តែខិតចូលមកដល់ និងក្រោយពេលក្រុមអ្នកភូមិបានចេញមុខតវ៉ាជាបន្តបន្ទាប់ពេលយុទ្ធនាការឃោសនាបោះឆ្នោត។ លោក ចាន់ សូវ៉េត មន្ត្រីអ្នកស៊ើបអង្កេតរបស់សមាគមអាដហុក ដែលបានតាមដានបញ្ហានេះបានបញ្ជាក់ថា ពិតជាមានវត្តមានលោក ហ៊ុន ម៉ាណែត ចូលអន្តរាគមន៍ដោះស្រាយបញ្ហានេះមែន។ លោកក៏សង្ឃឹមដែរថា បញ្ហានឹងអាចដោះស្រាយបានប្រសិនបើអាជ្ញាធរមានចេតនាដោះស្រាយមែននោះ៕
ស្តាប់ការផ្សាយផ្ទាល់របស់វិទ្យុសំបុកឃ្មុំពីភ្នំពេញ
ផ្សាយផ្ទាល់នៅម៉ោង
៥ព្រឹកនិង៨:៣០យប់
