អត្ថបទ និង រូបភាព RFI Khmer:
នៅថ្ងៃសៅរ៍នេះ ដូចបានគ្រោងទុក កូរ៉េខាងជើងនិងកូរ៉េខាងត្បូងបានចាប់ផ្តើមពិភាក្សាគ្នាពីតំបន់ឧស្សាហកម្ម Kaesongដែលបានបិទទ្វារលែងដំណើរការជិតបីខែមកហើយ។ កិច្ចចរចារវាងភាគីទាំ ង ពីរបានធ្វើឡើងនៅភូមិPanmunjum ជាប់ព្រំប្រទល់ប្រទេសទាំងពីរ។ គោលបំណងនៃកិច្ចចរចាគឺធ្វើយ៉ាងណាសំរេចអោយតំបន់ឧស្សាហកម្ម Kaesong បានបើកដំណើរការឡើងវិញ។ ប៉ុន្តែការពិភាក្សាគ្នាបានចាប់ផ្តើមយ៉ាងលំបាក។ ប្រទេសបងប្អូនកូរ៉េទាំងពីរបានទំលាក់កំហុសលើគ្នាទៅវិញទៅមក ដោយភាគីនីមួយៗបានចោទគ្នាថា ជាអ្នកបិទទ្វារតំបន់ឧស្សាហកម្ម Kaesong នេះ ធ្វើអោយខាតបង់ប្រាក់ចំណូល។
ការចរចាគ្នាស្តីពីតំបន់ឧស្សាហកម្ម Kaesong រវាងកូរ៉េខាងជើងនិងកូរ៉េខាងត្បូង នៅថ្ងៃសៅរ៍នេះ ហាក់ពិបាកនឹងចាប់ផ្តើមបានរលូនណាស់។ ជាក់ស្តែង កិច្ចពិភាក្សាមានការយឺតយ៉ាវដល់ទៅពីរម៉ោង ដោយសារតែត្រូវរង់ចាំអោយរួចរាល់នូវការជួសជុលប្រព័ន្ធទូរសព្ទដើម្បីទាក់ទងទៅក្រុងសេអ៊ូលសិន។ បន្ទាប់មកទៀត ពេលផ្តើមកិច្ចចរចា ភាគីទាំងពីរពិបាកនឹងត្រូវរ៉ូវគ្នាលើប្រធានបទដែលត្រូវលើកយកមកពិភាក្សាណាស់។
អ្វីដែលជាភាពចម្រូងចម្រាសក្នុងកិច្ចពិភាក្សាថ្ងៃនេះ គឺថាក្រុងព្យុងយ៉ាងនិងក្រុងសេអ៊ូលបានចោទ គ្នាទៅវិញទៅមកថា ម្នាក់ៗជាអ្នកបិទទ្វារមិនអោយតំបន់ឧស្សាហកម្ម Kaesong ដំណើរការ។ ក្រុងសេអ៊ូលចោទក្រុងព្យុងយ៉ាងថា បានបិទទ្វារតំបន់នេះធ្វើអោយសហគ្រាសកូរ៉េខាងត្បូងរងការខាតបង់ប្រាក់ចំណូល។ កូរ៉េខាងត្បូងចង់ទាមទារអោយកូរ៉េខាងជើងសរសេរជាលាយលក្ខណ៍អក្សរធានាថា នឹងមិនបង្កអោយមានការបិទទ្វារតំបន់នេះសាជាថ្មីនោះទេ។ ប៉ុន្តែមើលទៅការទាមទារនេះហាក់ពិបាកនឹងសំរេចបានណាស់។
ដោយឡែក ភាគីក្រុងព្យុងយ៉ាងបានប្រាប់ថា ប្រធានបទទាក់ទងការការពារថែរក្សាតំបន់ឧស្សាហកម្ម Kaesong អោយចៀសផុតពីផលវិបាកដែលបង្កដោយខ្យល់រដូវមូសុង នៅតែជាអាទិភាពក្នុងកិច្ចពិភាក្សានេះ។
គួររំលឹកថា តំបន់ឧស្សាហកម្មរួមគ្នា Kaesong បានបង្កើតឡើងក្នុងទស្សវត្សរឆ្នាំ ២០០០ជាតំបន់តំណាងការទូតប្រទេសកូរ៉េទាំងពីរ។ តំបន់នេះស្ថិតនៅទឹកដីកូរ៉េខាងជើង ចំងាយជាង១០គីឡូម៉ែត្រពីព្រំប្រទល់ប្រទេសទាំងពីរ។ តំបន់ Kaesong បានបិទទ្វារលែងដំណើរការបន្ទាប់ពីកូរ៉េខាងជើងបានដកបុគ្គលិកការងារខ្លួនចេញពីទីនោះ នៅថ្ងៃ៨ មេសាដើមឆ្នាំ។ បន្ទាប់ពីនោះ កូរ៉េខាងត្បូងក៏បានដកបុគ្គលិកខ្លួនពីទីនោះផងដែរ។ ការបិទទ្វារលែងដំណើរការកន្លងមក ធ្វើអោយតំបន់នេះខាតបង់ប្រាក់ចំណូលប្រមាណជាងមួយពាន់លានដុល្លារ៕
ស្តាប់ការផ្សាយផ្ទាល់របស់វិទ្យុសំបុកឃ្មុំពីភ្នំពេញ
ផ្សាយផ្ទាល់នៅម៉ោង
៥ព្រឹកនិង៨:៣០យប់
