អត្ថបទ និង រូបភាពៈ www.khmwr.rfi.fr:
ពីរថ្ងៃមុនការបើកកិច្ចប្រជុំសភាដំបូង គណបក្សសង្គ្រោះជាតិបានប្រមូលអ្នកតំណាងរាស្ត្រជាប់ឆ្នោតទាំងអស់ទៅជួបជុំគ្នានៅក្នុងខេត្តសៀមរាប។ គោលដៅនៃការជួបជុំនោះត្រូវបានគេពន្យល់ថាដើម្បីស្បថនៅពីមុខប្រាសាទអង្គរវត្តថា ពួកគេមិនក្បត់ឆន្ទៈរាស្ត្រ ជាដាច់ខាត និងប្តេជ្ញារកយុត្តិធម៌ជូនម្ចាស់ឆ្នោត។
តំណាងរាស្ត្រជាប់ឆ្នោតទាំង ៥៥ នាក់របស់គណបក្សសង្គ្រោះជាតិកំពុងធ្វើដំណើរតាមមធ្យោបាយរៀងៗខ្លួននៅព្រឹកថ្ងៃសៅរ៍នេះឆ្ពោះទៅកាន់ខេត្តសៀមរាប ដើម្បីស្បថនៅពីមុខប្រាសាទអង្គរវត្ត។ នេះបើយោងតាមលោក យឹម សុវណ្ណ អ្នកនាំពាក្យគណបក្សសង្គ្រោះជាតិដែលបានប្រាប់វិទ្យុបារាំងអន្តរជាតិនៅព្រឹកនេះ។ បើតាមលោក យឹម សុវណ្ណ អ្នកតំណាងរាស្ត្រទាំងនោះនឹងស្បថថា ពួកគេមិនក្បត់ឆន្ទៈរបស់រាស្ត្រជាដាច់ខាត និងត្រូវស្វែងរកយុត្តិធម៌ជូនម្ចាស់ឆ្នោត។
ការចាកចេញពីភ្នំពេញរបស់តំណាងរាស្ត្រគណបក្សសង្គ្រោះជាតិបានធ្វើឡើងពីរថ្ងៃមុននឹងកិច្ចប្រជុំសភាដំបូងដែលគ្រោងធ្វើនៅថ្ងៃចន្ទទី ២៣ កញ្ញាដើមសប្តាហ៍ក្រោយនេះ។ កិច្ចប្រជុំសភាដំបូងដែលនេះនឹងធ្វើឡើងក្រោមព្រះរាជអធិបតីភាពរបស់ព្រះមហាក្សត្រ។ ប៉ុន្តែ សម្រាប់ លោក យឹម សុវណ្ណ កិច្ចប្រជុំនេះផ្ទុយពីរដ្ឋធម្មនុញ្ញ និងបង្ហាញពីការមិនឯកភាពជាតិ។ ម្យ៉ាងទៀត លោកអះអាងថា កិច្ចប្រជុំនេះផ្ទុយពីព្រះរាជសាររបស់ព្រះករុណាដែលព្រះអង្គមានព្រះរាជបន្ទូលថាចង់ស្វែងរកយុត្តិធម៌ជូនម្ចាស់ឆ្នោត។
កាលពីថ្ងៃសុក្រ លោកសម រង្ស៊ី ប្រធានគណបក្សង្គ្រោះជាតិបានស្នើសុំព្រះមហាក្សត្រឲ្យពន្យារពេលកិច្ចប្រជុំសភាដំបូងរហូតដល់ថ្ងៃទី ៧វិច្ឆិកាដើម្បីទុកពេលចរចាជាមួយគណបក្សប្រជាជនកម្ពុជា។ ប៉ុន្តែ រហូតមកទល់ថ្ងៃនេះនៅមិនទាន់មានព័ត៌មានស្តីពីការលើកពេលកិច្ចប្រជុំសភានេះនៅឡើយទេ។ ព្រះមហាក្សត្របានបញ្ជាក់ប្រាប់ក្រុមអ្នកតំណាងរាស្ត្រគណបក្សសង្គ្រោះជាតិថា ព្រះអង្គធ្វើតាមរដ្ឋធម្មនុញ្ញ មាត្រា៨២ថ្មី ដែលតម្រូវឲ្យព្រះអង្គកោះប្រជុំសភាដំបូង ៦០ ថ្ងៃយ៉ាងយូរក្រោយការបោះឆ្នោត៕
ស្តាប់ការផ្សាយផ្ទាល់របស់វិទ្យុសំបុកឃ្មុំពីភ្នំពេញ
ផ្សាយផ្ទាល់នៅម៉ោង
៥ព្រឹកនិង៨:៣០យប់
